终于去完澳门翻嚟喇～～行咗成日～～对脚好攰下～～今朝我哋五条友8点度出门搭车去关闸～～10点几度过咗关～～汗～～好多师奶团啊～～过关揾咗某师奶帮我哋影咗张喺之后就开始去换钱～～我带咗400去～～换嗮港币～～虽然我觉得换港币唔着数～～不过佢哋都换嗮做港币咁就算啦～～之后搭车去某站～～原本谂住见识下澳门巴飞速垂直急转～～点知原嚟啲巴都行唔快嘅～～澳门又细路又窄～～行两步转个弯又话下一站嘞～～点快到吖～～落车见有啲肚饿～～于是去咗某间嘢度一人整翻一件6蚊葡挞～～阿政就叫咗个7蚊薄饼～～不过感觉同KFC啲葡挞差唔多～～KFC嗰啲仲便啲添～～

 

　　之后行到某条啲建筑同上下九好似嘅街～～有个旁边种满荷花嘅喷泉～～唔记得叫咩地方～～行咗一阵见到某教堂～～维修紧唔入得～～之后继续行又见到某教堂～～入去兜咗Round之后就去咗大三爸～～跟住落去下面所谓神圣嘅地方睇骨同某啲宗教用品同画～～之后上咗去隔离所谓澳门制高点度睇炮台～～影咗N张猥琐嘅相之后～～终于去食饭喇～～冇食早餐好肚饿～～我阿智同小鱼叫咗焗骨饭～～阿政同善津就叫咗焗佛笑楼饭～～啲焗骨饭啲猪扒係好有猪味嘅～～不过发觉太有猪味唔啱我口味～～早知叫焗佛笑楼饭啦～～喈係海鲜焗饭～～之前仲叫咗个法国蜗牛～～同上次食耗一样冇咩大感觉～～下面啲薯泥就几好食～～间嘢好贵～～个饭要五十几蚊～～蜗牛四十半打～～啲饮料都要廿几～～我哋平均每个人食咗七十几～～占咗我今次澳门旅百分之七十嘅消费～～虽然一煲饭睇落唔係好多～～不过好滞～～食完饱咗好耐～～

 

　　行路去盛世莲花～～途中见到某人好似金涛同张征宇嘅混合体～～晕～～之后喺某摊档见到某杂志封面写住“巴士阿叔召妓”～～封面图係巴士阿叔揽住三个女人～～唉～～估唔到巴士阿叔都成为传媒搞嘢嘅对象～～去到俾阿智影咗张完全托唔到莲嘅托莲相～～之后入咗隔离间葡萄酒博物馆同大赛车博物馆～～每人廿五买咗个博物馆通行证～～可以去六间博物馆～～不过最后都剩係去咗三间～～逛咗赛车馆先～～跟住去葡萄酒嗰边～～某鬼佬叫我哋拣支酒试～～我就拣咗Sweet White嘅酒～～佢哋就其它～～一共有六种酒～～就係Sweet三支～～Not Sweet三支～～每种都有Red White同Light～～小鱼拣咗Not Sweet嗰个～～好难闻～～好彩冇拣～～稍微试过佢哋嗰啲～～都係我嗰啲最好饮～～之后谂住去附近嘅东望人灯塔～～去到发觉喺山上面好高嘅地方～～于是放弃兜翻去盛世莲花嗰度搭车去妈阁庙～～白兜咗嗰大圈～～

 

　　去到妈阁庙～～求其睇睇个像～～睇睇旧石～～揾咗个欧巴桑影咗相就过咗去对面嘅海事博物馆嘞～～可惜由于时间嘅关系～～我哋得翻廿分钟睇嘢～～连妈阁庙历史都未睇完～～四幕过咗两幕就要走嘞～～不过都睇齐其它嘢嘅～～见到条好大嘅鱼～～但係好丑～～都係细条嗰啲可爱～～之后翻去最初嘅条街度嘅小泉居度食猪扒包～～啲包同中午佛笑楼啲餐包一样咁硬～～失望～～食饱去买埋手信～～我冇买～～全部都係嘢食唔想买～～阿政就买咗77蚊化妆品俾佢条女～～汗～～就准备落战场嘞～～

 

　　葡京我来也～～我预先拿个银出嚟抛～～一面大一面细～～入去几铺试下运气～～发觉个银好准～～十铺中八铺～～而且唔中嗰啲喺开之前我都会心跳加速～～赌场啲灵气係唔同Feel啲～～不过我都冇落～～我同阿政夹嗰个100蚊筹码我俾咗阿政～～叫佢随便投～～反正我入到嚟嘅感觉係我会旺嗮佢哋～～但係我自己就好难讲～～所以佢投咩都好～～唔会输～～唔知点解我有咁嘅信心～～后尾嘅结果同我最尾小试老虎机都证明我嘅第六感喺嗰度超准～～我同阿政睇过三张台～～睇二张係好恐怖嘅台～～嗰个对我嚟讲绝对係死位～～因为喺嗰度我个银从来都未中过～～十几廿铺都係咁～～仲试过连开两盘围骰添～～仲要係当我抛完然后否定抛嘅结果嗰阵～～佢就开抛嗰个～～但係当我顺便抛隔离张台嗰阵～～个银又中嗮啵～～嗰张台真係好邪啊～～最后第三张台嗰阵叫阿政落～～我另转面抛银～～冇睇～～见佢买咗细～～再睇下个银～～都係细～～结果～～细～～OK～～走得～～唉～～跟住我哋就拿咗50出嚟买银仔掟老虎机～～结果～～输到扑街～～剩係中过一次十同一次二～～老虎机果然好唔抵玩～～而且我对老虎机不嬲都冇自信～～结果我就赢咗25蚊～～至于佢哋啰啵～～就如我开头所讲啦～～几多我就唔讲嘞～～

 

　　玩完老虎机去兑翻人民币～～折咗啦～～早知就唔兑咁多啦～～先用过200度～～总消费唔计赚翻嗰25蚊先得120度～～少过我嘅预算成百蚊～～不过都係折几蚊喈～～搭车翻到嚟十点半度～～听到全部人哄动中～～原嚟係日本一比零领先但係俾人喺最后十分钟连入三球～～晕～～抵死嘅日本仔～～其实我冇咩感觉～～翻到嚟都已经好攰嘞～～就咁啦～～